Makkorán

Waššín watan mey makkorán
Dáem bebátey kámerán

Ábád o sabz o meyzarán
Har waqt ke tayi námá gerán

Tayi bú čú meská bit zarán
Tayi deljamín gaťť o garán

Syah band o sabzín ťihorán
Gapp a janant gún jambarán

Tayi saršam o drang o darán
Derr o sayádi sangarán

Tayi kallag o tayi ápsarán
Sabzín gwanekk gún zámerán

Xošbúter ant az záperán
Kúleg gún širkombín tařán

Kowrdap gún dáz o killařán
Tayi kuččag o tayi kohčarán

Dánič gún šemš o kalporán
Áškán mašir o pamporán

Zardpoll gún zardín komborán
Grančen pač ant čú ťapporán

Ďúlok gún zahm o esparán
Sowlín kahir gún šangarán

Jogr o kalír o kownarán
Širinter ant az šakkarán

Killag čú nillín xeybarán
Gwáš o gayábín kowrsarán

Wall gún šakartámín barán
Parmaš o máš gún bájerán

Číťant o sáťant lágarán
Gúrom gún bagg o báharán

Karpás gún syáhín sammarán
Júhán gún wanď o búharán

Marráney saťťant bíkerán
Dád ant saxáwat gostarán

Lahřbaxš o hátem darwarán
Bahr kanant gwáp o gwarán

Eyd ent pa brehek o bídarán
Jútág polí bíbondarán

Brenj rún moráhey šálgerán
Neštag dani čú gownarán

Dastur a dant pa čákarán
Kašant pa sar bár-e gerán

Grámáni čírá tattarán
Penďúk ma gwápán peškerán

Húš a čenant kerr o gwarán
Koťť a kanant čú tájerán

kandant gún zálán andarán
Lápey darín jat ambarán

Mačč gún garekká kúkerán
Dripánč o narmín simorán

Rúkín getránk čú angarán
Hámín gún pollín pattarán

Káyant o nendant šahrgwarán
Bandant beronk o káparán

Lonjín šagazz gún ďangarán
Sondgwáp gún ják o jallařán

Romb o awáčk o algarán
Gapp ent gehín xošmahzarán

Tayi súhawín san'atgarán
Sini šalit gún sásarán

Kappú gún gerdín čapparán
Dehkán gún túrá šikwarán

Borzín gaříláni sarán
Gwaršan gún šinki ťokkorán

Íwand čú márá šíbgerán
Diwán kotag ázáwarán

Púnčen čú múrá sorsorán
Pát o kapát o komborán

Lúďig gún ťih o ťomborán
Múled gún názínk o során

Ťúmbak gún ďohl o ďokkorán
Šádeh kotag rúšáwarán

Lonjín tayáb o bandarán
Daryá gún wád o kallařán

Bújig gún lúhín nangarán
Nowl a kanant pásinjerán

Tayi mačču gwana máhi gerán
Káyant ča nilbúín zerán

Sárm o tegelm o lujjarán
Kášok gún waššín kúlgarán

Gúr gún mazan kálkí kerán
Delsúk a bant xormáxorán

Zíd o čerágín súldarán
Bagg o nalaďín hošterán

Barri kalam gúšín harán
Asp o hazári grohbarán

Bozgal gún míš o míhařán
Mahri gún poll o pákařán

Lířah gún pilli báhořán
Ďáči gún bígwamsín jařán

Káyant ča jidá zanzarán
Porráp gún ťáb o ťáhorán

Gámíš gún dihi  ďaďďarán
Sánď čú hamá jánáwarán

Náhenjamín karigarán
Gún ant šarik o núkarán

Ják ent modám tayi jomborán
Rájey kamášín sarwarán

Sáhebdelín dinparwarán
Širhemmatín soltánparán

Jangúl o sargwamsín narán
Nújwán gún širi ťíťerán

Bránz a gerant čú eškarán
Poštá na kenzant ťakkarán

Tayi mehrabánín mádarán
Šir a dayant Šírgollořán

Balkín kapant rúčí gařán
Baxšant sará pa brádarán

Tayi mahlaqáín doxtarán
Áhugrawájín dramgwarán

Pák ant čú ápi gowharán
Čír ant ča čašm-e axtarán

Tayi golkandagín mahpeykarán
Lajjáni názín kowtarán

Wašš čámolín manjah sarán
Pašk o sarig o čáderán

Sangow gún zarrín zíwarán
Bikkán a dranzant antarán

Mesk o zabád o anbarán
Ahdeš kota gún šowharán

Múrí na ďokkit máparán

Ey makkorán, Ey makkorán
Dáem pa tayi yádá zarán

Tayi maťť na ent mázendarán
Waspet kanán tán dam barán!